கண்ணனைக் காண்பேனே..கார்முகில் வண்ணனை காண்பேனே..

கண்ணனைக் காண்பேனே..

கண்ணா! கண்ணா! ஆனந்தக் கண்ணா!

கண்ணா! கண்ணா! ஆனந்தக் கண்ணா!
ஓடக்குழலும் கொண்டோடிவா கண்ணா!
தேவகி தந்ததோர் கண்மணிக் கண்ணா!
ஆனந்தக் கண்ணா! ஓடிவா கண்ணா!

காளிய நர்த்தனம் செய்ததோர் கண்ணா
ஆனந்தக் கண்ணா ஓடிவா கண்ணா!
கோவர்த்தனகிரி தூக்கிய கண்ணா
ஆனந்தக் கண்ணா ஓடிவா கண்ணா!

கம்ஸனை நிக்ரகம் செய்ததோர் கண்ணா
ஆனந்தக் கண்ணா ஓடிவா கண்ணா!
பக்தரைப் பாலிக்கும் கண்ணா கண்ணா
ஆனந்தக் கண்ணா ஓடிவா கண்ணா!

ஆருடம் ஒன்று சொல்லடி ..

வரிகள் : ஊத்துக்காடு வெங்கடசுப்பையர்
ராகம் : கல்யாணி
தாளம் : ஆதி

ஆருடம் ஒன்று சொல்லடி - என்
அந்தரங்க சிந்தையுடன் வந்து உறவாடின
நந்த முகுந்தன் எந்த நாளும் அகலாதிருக்க ( )

பாரோடு விண்ணாகப் பரந்திருந்தானே
பச்சைப் பிள்ளைத்தனம் போகவில்லையே மானே
ஆரோடு சொல்வேனோ அந்தரங்கம் தானே
அந்தரங்கம் ஆனாலும் சிந்தை நாணம்தானே ( )

அலைந்து வெண்ணை திருட அதிலென்ன இருக்கோ
அத்தைமகன் மேலேயும் இவனுக்கென்ன வெறுப்போ
ஒரு பிடி அவலுக்கு உலகம்தான் கணக்கோ
உள்ளதைச் சொல்லப்போனால் உனக்கென்ன சிரிப்போ.. ( )

அச்சம் இல்லாமல் அரவமேலே நின்றாடுவான்
ஆரும் அழைக்க வந்தால் அவர் பின்னே ஓடுவான்
மிச்சம் மீதி இல்லாது வெண்ணை களவாடுவான்
வேண்டாமே கண்ணா என்றால் வேணவழக்காடுவான்..( )

கிருஷ்ண ஜெயந்தி வாழ்த்துக்கள்

வருவாய் வருவாய் வருவாய் கண்ணா!

வருவாய் வருவாய் வருவாய் - கண்ணா!
வருவாய் வருவாய் வருவாய்!

உருவாய் அறிவில் ஒளிர்வாய் கண்ணா!
உயிரின் அமுதாய் பொழிவாய் கண்ணா!
கருவாய் என்னுள் வளர்வாய் கண்ணா!
கமலத் திருவோ டிணைவாய் கண்ணா! (வருவாய்)

இணைவாய் எனதா வியிலே கண்ணா!
இதயத் தினிலே அமர்வாய் கண்ணா!
கணைவா யசுரர் தலைகள் சிதறக்
கடையூ ழியிலே படையோ டெழுவாய்! (வருவாய்)

எழுவாய் கடல்மீ தினிலே எழுமோர்
இரவிக் கிணையா உளமீ தினிலே
தொழுவேன் சிவனாம் நினையே கண்ணா!
துணையே, அமரர் தொழும்வா னவனே! (வருவாய்)

திருமலை வாழும் ஸ்ரீவேங்கடேசா..

திருமலை வாழும் ஸ்ரீவேங்கடேசா
பெறுநிதி தருவாய் எங்கள் ஸ்ரீனிவாசா
நிகரில்லா நின் பெருமை கூறிடுவேன் (2)
நீலமேக சியாமளமே இதயம் நிரம்பிடுவாய்..()

வீசிடும் பூங்காற்றின் சுகமே கண்டிடுவாய்
பறந்திடும் வண்டினங்கள் இசையை கேட்டிடுவாய்
அடியவர் குலம்காத்து அகமே மகிழ்வாய்
பூலோக வைகுந்தமாம் திருமலை காட்டிடுவாய்.. ( )

அலர்மேலு மங்கையவள் அழகினில் கலந்தவனே
அளவிலா நன்மைதரும் திருமலை வேந்தனே
கருணை விழிகளால் அருளை பொழிவாய்
கனிவான வாசனே எங்கள் ஸ்ரீனிவாசனே..( )

அழகான தாமரைமேல்..

அழகான தாமரைமேல் எழிலாக அமர்ந்திருக்கும் அலர்மேலுமங்கை மணவாளா
ஏழுமலை மீது காட்சிதந்து ஏழுலகம் ஆட்சிசெய்யும் மங்களநாயகா வெங்கடேசா
    எங்களை ஆளவா ஸ்ரீனிவாசா..(அழகான)

தழைத்தோங்கும் செந்தமிழில் உனைப் பாடுவேன்
நீ தயங்காமல் வருவாய் என் கண்ணா
மழையினில் மழை தன்னை குடையாய்ப் பிடித்தவனெ
மலைஏழும் தாங்கி நிற்கும் மாதவனே மாயவனே (அழகான )

விழிகள் இரண்டும் ஒளிவிடும் தீபங்கள்
வழிகாட்டும் கீதையோ நீ தந்த பாடங்கள்(2)
அரியே உன் அருள்தானே இன்னிசை நாதங்கள்(2)
சரணடைந்தேன் உந்தன் தாமரைப் பாதங்கள் (2) (அழகான)

திருமலை வருவோர்க்கு சேர்ந்திடும் செல்வங்கள்
திருவடி பணிவோர்க்கு பெருகிடும் சுகங்கள்
திருமார்பில் மங்கையுடன் மின்னிடும் வைரங்கள்
பரந்தாமா நீ தருவாய் நான் கேட்கும் வரங்கள்(2)(அழகான)

அல்லும் பகலும் உன்னை தொழுதிடும் அன்பர்கள்
     கோரிக்கை ஏற்கும் கோவிந்தா
கலியுகம் தன்னில் கண்கண்ட தெய்வம்
    நீதானே ஹரி கோவிந்தா
சங்கு சக்கரம் கொண்ட உன்கரம் இன்பம்
    என்றும் தரும் கோவிந்தா
எந்தநாளுமே சுப்ரபாதமே பாடிடுவேன்
     ஹரி கோவிந்தா

கோவிந்தா கோவிந்தா கோவிந்தா கோவிந்தா...

அருணோதயத்தின் ஆன்மிக விழிப்பில்

அருணோதயத்தின் ஆன்மிக விழிப்பில்
அடியாரனைவரும் எழுந்து நீராடி
ஆலய மணிகள் இசைத்து
அன்போடு பாடும் சுப்ரபாதம்..சுப்ரபாதம்..( )

சங்க நாதம் உன் துயில் நீக்கும்
தங்க மேனிக்கு தைலாபிஷேகம்
வாஞ்சையோடு நீராட்டி துடைத்து
பன்னீரில் கரைத்த சந்தனம் எடுத்து
கண்ணா உன் திருமேனி எங்கும் பூச..()

மகுடம் தன்னில் மயில்பீலி வைத்து
மலர்மாலை சூட்டி சலங்கை கட்டி
கோபியிட்டு பட்டுக் கோவணம் கட்டி
குருவாயூரப்பா குழந்தை கண்ணா
உன் கையில் வெண்ணெயை உருட்டி வைக்க..()

மாயக் கண்ணன் சிரிக்கின்றான்

மாயக் கண்ணன் சிரிக்கின்றான் - எங்கள்
மன்னன் கண்ணன் சிரிக்கின்றான்
அன்புக் கண்ணன் சிரிக்கின்றான் (2) - எங்கள்
ஆசைக் கண்ணன் சிரிக்கின்றான்..(மாய)

கோடிகோடி அடியவர் கண்டு சிரிக்கின்றான்
நாடிநாடி வந்து சேரும் மாந்தர் கண்டு சிரிக்கின்றான்
பாடிபாடி புகழ்கின்ற பாடல் கேட்டு சிரிக்கின்றான்
ஆடிஆடி மகிழ்கின்ற ஆடல்கண்டு சிரிக்கின்றான்..(மாய)

குழலிசையின் சொந்தக்காரன் கைகொட்டிச் சிரிக்கின்றான்
கோபியர்கள் வாழ்வே ஆன கோபாலனே சிரிக்கின்றான்
காளிங்க நர்த்தனம் புரிந்த மாயன் கள்ளச் சிரிப்பு சிரிக்கின்றான்
கடமையை செய்ய சொன்ன கண்ணன் கன்னம் குழைய சிரிக்கின்றான்..(மாய)

நிரந்தரமாய் இனிவு கொண்டவனே

நிரந்தரமாய் இனிவு கொண்டவனே
நின் பேரழகைக் காண பேறு செய்தேன்
சுதந்திரமாய் பிருந்தாவனத்தில் சஞ்சரித்தவனே ( )

அழகுமிகு மயில்பீலி அணிந்தவனே
குழலினை தாங்கும் மென்வாயிதழ் உடையவனே
குழந்தையாக பல ஜாலங்கள் செய்தவனே
குவலயத்தை வாய் திறந்தே தாயிடம் காட்டியவன்

காதல் பொங்கும் உந்தன் கண்களை கண்டனரே
பொழிவு மங்கையர் மயங்கியே நின்றனரே(2)
ஒன்றுமே அறியாதவன் போன்றே நீயுமே
மாயக் குழலினை இசைத்தாயே சொல்லிடுவாய் ஏன் கண்ணா..()

கொண்டல் வண்ணனை..

கொண்டல் வண்ணனை கோவலனாய் வெண்ணெய்
உண்டவாயன் என் உள்ளம் கவர்ந்தானை
அண்டர்கோன் அணி அரங்கன் என் அமுதினை
கண்ட கண்கள் மற்றொன்றினை காணாதே..
- நாலாயிர திவ்யப்ரபந்தம்

நாடிவந்த செல்வம் தன்னை..

நாடிவந்த செல்வம் தன்னை ஏழைகட்கு நீ கொடுத்து
நாட்கள் முற்றும் பாடு கண்ணனை..
நல்லவர்கள் சொற்சரத்தில் உள்ளமுற்றுமே இணைத்து
நாளும் பாடு கீதை வர்ணனை..
நாளும் பாடு கீதை வர்ணனை..(நாடிவந்த)

தேடி ஓடு ஈசன் பாதம் ஓது ஓது தேவ வேதம்
செய்க என்றும் தெய்வசிந்தனை..
சிறிது மட்டும் சொன்னதுண்டு அதிகம் சொல்லத் தேவையில்லை
தீமையாகும் தெய்வ நிந்தனை..(நாடிவந்த)

கோடி கோடி வந்தபோதும் நோய்நொடிக்கு நீ இலக்கு
கூடுவாய் அத்தேவன் பாதமே..
கோகுலத்தில் லீலை செய்து போர்முகத்தில் கீதை சொன்ன
கோகுலனைப் பாடு உள்ளமே..(நாடிவந்த)

பச்சை மாமலைபோல் மேனி

பச்சை மாமலைபோல் மேனி பவளவாய் கமலச் செங்கண்
அச்சுதா அமரரேரே ஆயர்தம் கொழுந்தேயென்னும்
இச்சுவை தவிர யான்போய் இந்திரலோகமாளும்
அச்சுவை பெறினும் வேண்டேன் அரங்கமா நகருள்ளானே..--
- நாலாயிர திவ்யப்ரபந்தம்

புல்லாய்ப் பிறவி தரவேண்டும்

வரிகள் : ஊத்துக்காடு வெங்கட சுப்பையர்
ராகம் : செஞ்சுருட்டி
........................
புல்லாய்ப் பிறவி தரவேண்டும் - புனிதமான
பல கோடி பிறவி தந்தாலும்
பிருந்தாவனமிதிலொரு - (புல்லாய்)

புல்லாகினும் நெடுநாள் நில்லாது - ஆதலினால்
கல்லாய்ப் பிறவி தரவேண்டுமே கண்ணா
கமல மலரிணைகள் அணைய எனதுள்ளம்
புளகிதமுற்றிடும் பவமற்றிடுமே - (புல்லாய்)

ஒருகணம் உன்பதம் படுமெந்தன்மேலே
ம்றுகணம் நான் உயர்வேன் விண்மேலே
திருமேனி என்மேலே அமர்ந்திடும் ஒருகாலே
திருமகளென மலர்பெயர்ந்தடி உன்னைத்
தொடர்ந்த ராதைக்கு இடம்தருவேனே
திசைதிசை எங்கனும் பரவிடும் குழலிசை
மயங்கிவரும் பலகோபியருடனே (2)

சிறந்த ரசம்மிகு நடம் நீ ஆடவும்
சுருதியொடு லயமிக கலந்து பாடவும்
திளைப்பிலே வரும் களிப்பிலே
எனக்கிணை யாரென மகிழ்வேனே
தவமிகு சுரரோடு முனிவருடன் நான்
தனித்த பெரும்பேர் அடைவேனே
எவ்வுயிர்க்கும் உள்கலக்கும் இறைவனே
..யமுனை துறைவனே..(புல்லாய்)

சென்று வா நீ ராதே..

வரிகள் : ஊத்துக்காடு வெங்கட சுப்பையர்
ராகம் : ராகமாலிகா
………………………………………….
சென்று வா நீ ராதே இந்தப் போதே - இனி
சிந்தனை செய்திட நேரமில்லை (சென்று வா)

கன்று பசு மேய்க்கும் நாட்டத்திலே - அவரை
காண வரும் ஆயர் கூட்டத்திலே
சற்று நின்று பேசிட நேரமில்லை(2) - அவருக்கு
நேரில் வரஒரு தோதுமில்லையடி (சென்று வா)

சொன்னாலும் புரியாது ராதே - உனக்கு
தன்னாலும் தோன்றாது ராதே - அந்த
மன்னனை நம்பாதே - ஆயர்குல
மன்னனை நம்பாதே - அந்த
மனனனின் வாக்கெல்லாம் மண்தின்ற வாய்தானே
ராதே ராதே.. (சென்று வா)

உலகை அளந்தவருக்கு உன்னிடம் வந்தொருபொய்
மூட்டி அளப்பதும் பாரமா..
கண்ணன் நலம்வந்து ஆயிரம் சொன்னாலும் அதை
நம்பிவிட நியாயமாகுமா..
ஆயர்குலத் திறைவன் நந்தகோபன் திருமகன்
சொல்வதெல்லாம் உண்மையாகுமா..
தலத்தருகே கண்ணன் தனித்து வருவதென்றால்
தவப்பயன் ஆகுமே..வினைப்பயன் போகுமே..(சென்று வா)

கண்ணா உன் சன்னிதியில்..

கண்ணா உன் சன்னிதியில் நானும் இடம்பெறவேண்டும்
கருணையுடன் எனக்கு அருள்வாய்..
காலடியில் நானிருக்க காலமெல்லாம் தொழுதிருக்க
தகுதியை எந்தனுக்கு அருள்வாய்..(கண்ணா)

ஊதுவத்தி எரிவதென்ன அதற்கிங்கு தகுதியென்ன
உணர்ந்திட நானும் கொஞ்சம் விழைந்தேன்
தன்னையே எரித்துகொண்டு தருவது நறுமணத்தை
தியாகமே தகுதியென்று உணர்ந்தேன்..

பற்றியது கற்பூரம் சுற்றியது தட்டோடு
காட்டியது கண்ணா உன் உருவை
எரிந்தது கற்பூரம் எதுவுமே மிச்சமில்லை
தெரிந்தது தேவையான தகுதி..

புல்லாங்குழல் உனது கைகளில் தவழ்ந்திருக்க
புண்ணியம் செய்ததென்ன வியந்தேன்..
காட்டிலே வாழ்ந்த அது வீட்டினை விட்டுவந்து
கஷ்டமிக ஏற்றதனை உணர்ந்தேன்..
அங்கமெல்லாம் சீவிசீவி அறுத்தனர் துண்டு துண்டாய்
அனலில் இட்டு அதை வாட்டி
துளைத்தனர் உடல் முழுதும்
சகித்தது அத்தனையும்..
கிடைத்தது கண்ணா உன் ஸ்பரிஸம் ..(கண்ணா)

யசோத நந்தபால கோபாலனே

யசோத நந்தபால கோபாலனே
ஏழை என்மீதேன் வன்மமோ
பேதை என் ஓலம் கேட்டுமே
பேசாதிருப்பதேன் கேசவா..()

நந்தகுமாரா நவனீத சோரா பிருந்தாவன வாசி கோவிந்தா
வெண்ணை அள்ளி உண்ட வேணுகானனே
மண்ணை அள்ளி உண்ட மதுசூதனா
பண்ணிசைத்த பாவையர்கள் உள்ளத்தை
கொள்ளை கொண்ட கோமள வண்ணனாம்..
கோமளமாம் அந்த கேரளம் தன்னில்
கோயில் கொண்ட குருவாயூரப்பா (2)
கோடி தவம் நான் செய்தாலுமே-உன்
கோலம் கண்பேனோ என் வாழ்விலே
தேட கிடைக்காத செல்வமே
தேவாதிதேவா நாராயணா..
நாராயணா நமோ நாராயணா
நாராயணா லஷ்மி நாராயணா
நாராயணா ஹரி நாராயணா...

குழலூதி மனமெல்லாம்..

வரிகள் : ஊத்துக்காடு வேங்கட சுப்பையர்
ராகம் : காம்போதி
தாளம் : ஆதி
--------------------------------------
குழலூதி மனமெல்லாம் கொள்ளை கொண்ட பின்னும்
குறையேதும் எனக்கேதடீ - ஒரு சிறு
குறையேதும் எனக்கேதடீ (குழலூதி)

அழகான மயில் ஆடவும் - மிக
அழகான மயில் ஆடவும் - காற்றில்
அசைந்தாடும் கொடி போலவும்

அகமகிழ்ந்திலகும் நிலவொளி தனிலே தனைமறந்து புள்ளினம் கூட
அசைந்தாடி மிக இசைந்தோடிவரும் நலம் காண ஒரு மனம் நாட
தகுமிக எனஒரு பதம்பாட தகிடதமிதி என நடம் ஆட
கன்று பசுவினொடு நின்று புடைசூழ,
என்றும் மலருமுக..இறைவன் கனிவோடு (குழலூதி)

மகர முண்டலம் ஆடவும் - அதற்கேற்ப
மகுடம் ஒளி வீசவும்
மிகவும் எழிலாகவும் - காற்றில்
மிளிரும் துகில் ஆடவும்
அகமகிழ்ந்திலகும் நிலவொளி தனிலே தனைமறந்து புள்ளினம் கூட
அசைந்தாடி மிக இசைந்தோடிவரும் நலம் காண ஒரு மனம் நாட
தகுமிக எனஒரு பதம்பாட தகிடதமிதி என நடம் ஆட
கன்று பசுவினொடு நின்று புடைசூழ,
என்றும் மலருமுக..இறைவன் கனிவோடு (குழலூதி)

பார்வை ஒன்று போதுமே..

வரிகள் : வெங்கட சுப்பையர்
ராகம் : சுருட்டி
தாளம் : ஆதி
........................
பார்வை ஒன்று போதுமே கண்ணா கண்ணா - கள்ள
பார்வை ஒன்று போதுமே கண்ணா கண்ணா - சங்கப்
பதும நிதி இரண்டும் வலியத் தந்தாலென்ன கள்ளப் (பார்வை)

கார்முகில் போல்வண்ண கதிரென்ன மதியென்ன
கருவிழி கடலினை சற்றே திறந்து
கருணை மழை பொழிந்தென் அகம் குளிரும் கள்ளப் (பார்வை)

அன்னை யசோதை அருகினிலே சென்று இவன்
வெண்ணை திருடிவந்த விந்தை சொல்லப் போனால்(2)
அன்னையின் பின்னை சென்று அணைத்துக்கொண்டு நின்று
'சொல்லாதே' என்று கண்ணா சொல்லிடும் –கள்ளப் (பார்வை

எந்த விதமாகிலும்..

வரிகள் : வெங்கட சுப்பையர்
ராகம் : காம்போதி
தாளம் : ஆதி
.............................
எந்த விதமாகிலும் நந்த முகுந்தனை நீ
இந்த வழி வரும் வரை பாரடி (2) - சற்று
இந்த வழி வரும் வரை பாரடி ( எந்த)

கந்தம் கமழ் குழலி ராதே...
கந்தம் கமழ் குழலி ராதே ராதே என்று
ராதே ராதே என்று
கனிய மனமுருகி புனைந்துரைத்து
கள்ளத்தனமென்று மெள்ள நீ சொல்லி..
செய்வதெல்லாம் வஞ்சம் அல்லவோ பெண்ணே..
அல்லவோ பெண்ணே
சிந்தித்து பாராய் இதையே எண்ணி எண்ணி (2)
கைவிளங்கும் குழலை நீ கவர்ந்தோடி வா பெண்ணே
கைகட்டி ஓடி வருவாரடி- பின்னே
கைகட்டி ஓடி வருவாரடி.. ( எந்த)